Materia prima é un mapa, unha cartografía que orienta ao lector a través da narrativa galega contemporánea. Este é o seu estado actual, unha importante aproximación antologada e prologada polos críticos literarios Ramón Nicolás e Armando Requeixo. Son, todos, relatos inéditos, escritos especialmente para a ocasión, boa materia prima transformada en ricaz expresión dun tesouro creativo do noso presente e do porvir literario máis inmediato. Unha antoloxía da narrativa galega so século XXI. Os últimos días de Franco; unha fuxida cara a ningures no día da caída das Torres Xemelgas; a outredade e o amor; os comezos das andainas dun criminal; a pulsión amorosa e a adolescencia perdida; a ofegante opresión dun mundo subvertido; o extraordinario e o paranormal; o ronsel da tribo dos Waqwaq; o amor na adolescencia; o proceso de degradación humana; a memoria da guerra civil...
