Lola, propietaria da santiaguesa boite «Toulouse Lautrec», relata cada noite a súa vida sobre o escenario, vida que xira arredor do seu traballo como cabareteira, así como as súas relacións con tres homes: Paco, o seu querido veciño, da afastada aldeíña de Couzadoiro, onde ambos os dous naceron; Raúl, o coronel que lle puxo casa na viguesa rúa Colón; e o xeneral Aniano, o seu socio. Acompañada sempre por Reme (a súa secretaria e confidente) e por Rufino (o seu profesor de canto), a rapaciña aldeana converterase nunha das mulleres máis desexadas do seu tempo. A ruína que se produciu no mundo rural galego nos últimos cincuenta anos e a imposibilidade do amor, concibido como unha falacia que só beneficia aos homes, son temas centrais desta novela de lectura apaixonante que dá conta dos tempos difíciles do franquismo.
